Vul ook mikro-elemente in grond aan
Deur Charl van Rooyen cvanrooy@landbou.com
Baie boere vul ná ’n oes net die makro-elemente aan wat deur die voorafgaande gewas uit die grond onttrek is, maar doen nie noodwendig dieselfde met die noodsaaklike mikro-elemente nie.
Hoekom dien boere jaarliks NPK-misstowwe op hul grond toe, maar nie mikro-elemente nie? Die mikro-elemente word tog ook deur die gewas uit die grond geneem.
Sink word wel gewoonlik teen 0,5% by misstowwe gevoeg, maar die vorm wat gebruik word (sinkoksied), is nie noodwendig die optimale bron nie. Ander belangrike mikro-elemente word selde in die grond toegedien. Hoekom? Mnre. André Immelman, besturende direkteur, en Phillip Venter, besigheidseenheidsbestuurder, van Zinchem sê noodsaaklike mikro-elemente, soos koper, mangaan, yster en boor, verg meer aandag, want dit is belangrik om die regte hoeveelhede van daardie elemente wat deur die gewasse benut is, weer aan te vul.
Die feit dat mikro-elemente histories nie met soveel aandag soos NPK-misstowwe aangevul word nie, kan hoofsaaklik aan drie struikelblokke toegeskryf word, wat nie die boer se skuld is nie. Hierdie probleme is grotendeels deur die mikro-elementbedryf geïgnoreer en te min is gedoen om die boere by te staan om dit te oorbrug.
Dié probleme is die beskikbaarheid van produkte van ’n goeie gehalte vir grondtoediening, die bekostigbaarheid van sulke produkte en die gebrek aan maklike metodes vir grondtoedienings.
Zinchem het al drie probleme opgelos met die ontwikkeling van ’n nuwe reeks kombinasies van mikro-elementprodukte, genaamd multimikro, tesame met nuwe toedieningsapparaat.
Die produkte bestaan uit 100% wateroplosbare bronne van ses van die belangrikste mikro-elemente, naamlik sink (Zn), koper (Cu), mangaan (Mn), yster (Fe), boor (B) en molibdeen (Mo).
15Sekere van die formulasies wat op die grond toegedien word, is ook met humate verryk. Die produkte is in kristalvorm beskikbaar, wat maklik oplos en dan deur besproeiingstelsels, tenks op planters of trekkerspuite toegedien kan word.
Die woordvoerders sê hulle het apparaat ontwikkel om mikro-elemente vir rygewasse in die plantervoor toe te dien. Sodoende kan verbeterde saailinggroei verkry word, omdat die noodsaaklike mikro-elemente dadelik beskikbaar is om minstens gedeeltelik enige omgewingstoestande wat groei kan strem, te oorbrug.
Die doel van die produk is dus nie om die hele gewas te voed nie, maar slegs ’n goeie wegtrek te verseker deur ’n goeie wortelstelsel te ontwikkel.
Dit sal die plant help om beter in sy vog- en voedingsbehoeftes te voorsien en minder gevoelig vir ongunstige grond- en omgewingstoestande te wees. Die produk kan jaarliks gebruik word om in die rygewasse se behoeftes vir mikro-elemente te voorsien, sê Immelman en Venter.
Formulasies
Die reeks produkte bestaan uit sowat ’n dosyn verskillende grondtoedienings en blaarvoedings.
Die volgende gewasse het ’n gewasspesifieke blaarvoedingformulasie:
Graangewasse, sonneblomme, grondbone, droëbone, sojabone, groente, vrugte en druiwe, asook pekanneute. Spesifieke formulasies vir grondtoediening is vir alle rygewasse, groente, suikerriet en die bosbou ontwikkel. Zinchem kan enige kombinasie van die noodsaaklike mikro-elemente as voor skrifmengsels verskaf.
Die maatskappy moet gedetailleerde grondmonsters neem om die mikro-elemente te ontleed voordat korrekte aanbevelings gemaak kan word. Die aanbevelings word dan met die boer bespreek en hulle besluit saam op ’n oplossing wat die beste, bekostigbare resultate sal lewer.
Dit bestaan gewoonlik uit ’n voorstel vir die balansering van die mikro-elemente in die grond en voorstelle vir grond- en blaartoediening. Zinchem se sakemodel laat spesifiek ruimte vir boere met unieke formulasiebehoeftes, wat nie deur die “van die rak af”-reeks gedek word nie, om ook vir klante voorsiening te maak wat kleiner hoeveelhede unieke vermengings benodig.Ernstige tekorte aan mikro-elemente moet met grondregstellings opgelos word deur die element wat die gewasopbrengs die meeste belemmer, tot ’n optimale vlak aan te vul. ’n Gevolg daarvan is dat ’n ander element dan weer opbrengsbeperkend sal wees en ook aangevul moet word.
Vir die beste resultate behoort die grondregstelling in die rustende tyd tussen stroop- en planttyd gedoen te word.
Aangesien die produkte wat deur Zinchem verskaf word, wateroplosbaar is, kan die produk in water opgelos en breedwerpig oor die land uitgespuit en dan ingewerk word. Enkelprodukte word gewoonlik met die grondregstelling gebruik om spesifieke tekorte aan te vul. As dit ’n sinktekort is, kan die boer uit drie sinksulfaatprodukte kies, naamlik sinksulfaat-heptakristalle (22% Zn), sinksulfaat-monokristalle (34% Zn) en sinksulfaat-korrels (34% Zn). Vir ’n tekort aan koper en mangaan is daar kopersulfaat en mangaansulfaat.
Die voorstelle vir grond- en blaartoediening is daarop gemik om minstens aan ’n deel van die gewas se mikro-elementbehoeftes aandag te gee. Met die nuwe multimikro-grondtoedieningsprodukte word die beste resultate verkry deur dit regstreeks in die plantervoor met die mikro-elementtoediener te plaas.
Die blaarvoedingreeks bied die boer nóg ’n kans om mikro-elementaanvullings te doen as dit nie vroeër prakties moontlik was nie. Dit is geformuleer om te help verseker dat gewasse optimaal fotosinteer vir optimale opbrengste van graan van ’n hoë gehalte.
Hulle sê hierdie produkontwikkeling (die formulasies én die toedieningsapparaat) is innoverend in die sin dat nie baie voorbeelde elders in die wêreld gevind word waar kristalprodukte in sakke verskaf word, tesame met toedieningsapparaat, en dus die boer die geleentheid gee om self sulke hoogs gekonsentreerde produkte op die plaas te vermeng nie.
Die kostebesparings as gevolg van die produkkonsentrasies op verpakking en vervoer maak dat die produkte uiters bekostigbaar is. Teen ’n koste van minder as R100/ha sal ’n rygewasboer die mikro-elementtekort in die grond kan aanvul.
Blaartoedieningsprodukte is ook beskikbaar in die reeks, maar is duurder en kan dus minder kostedoeltreffend as grondbehandeling wees. Terselfdertyd moet gemeld word dat, hoewel die blaartoedieningsprodukte duurder is, dit steeds ’n breukdeel van die koste van alternatiewe, soos chelate, is, sê die woordvoerders. Die meeste groot verspreiders hou die produkte aan. Regstreekse aankope by Zinchem is ook moontlik.
Toediening word verder vergemaklik met ’n maatbeker wat akkurate afmetings in milliliter en milligram aandui. Dit dui die afmetings met kleurkodes van al die nuwe produkte op dieselfde maatbeker aan.
Klante wat meer as ’n sekere hoeveelheid produkte koop, kry die maatbeker gratis. Dit is ook te koop.
Bekostigbaar
Om die produkte bekostigbaar te maak, het Zinchem verskeie strategieë gevolg:
- Gekonsentreerde produkte. Deur die produkte in kristalvorm en in sakke te verkoop (wat dan deur die boer op die plaas in water opgelos word), word op vervoerkoste bespaar omdat die boer nie grotendeels water plaas toe vervoer nie. Waar ander produkte konsentrasies van mg/kg het, het Zinchem se multimikro-produkreeks konsentrasies van g/kg.
- Toegang tot grondstowwe. Danksy betrokkenheid by en blootstelling aan ander industriële markte vir sink en koper het Zinchem toegang tot goeie bronne van grondstowwe, waarvan onder meer sinksulfaat vervaardig word.
- Unieke tegnologie en vervaardigingsprosesse. Oor die laaste vyf jaar het Zinchem baie geld en tyd aan die ontwikkeling van nuwe produksieprosesse (sommige is aan patentaansoeke onderhewig) en die verfyning van bestaande prosesse bestee. Dit plaas Zinchem in ’n unieke posisie om kostedoeltreffend produkte van ’n hoë gehalte te kan vervaardig.
- Massa-volumemark. Deur die tradisionele nismark vir mikro-elementtoedienings tot die beskikking van alle boere te stel, bereik Zinchem skaalekonomie, wat tot hoër produktiwiteit en laer eenheidskoste lei. Dit lei tot meer bekostigbare produkte.
- Toegespitste reeks produkte en unieke kennis van die mikro-elementmark. Pleks van honderde verskillende produkte te bemark, fokus Zinchem op ’n kleiner reeks spesialisprodukte wat waarde toevoeg. Die meer toegespitste bemarkingsbenadering, gekoppel aan ’n unieke begrip vir die behoeftes van hierdie mark, plaas die maatskappy in ’n posisie om beter resultate te bereik.
